shrImaan.h ve~NkaTa naathaaryaH kavitaarkika kesarI.
vedaantaachaarya varyo me sannidhattaaM sadaa hR^idi..

sa~Nkalpa kalpa latikaam.h avadhiiM xamaayaaH
svechchhaa varaaha mahiShiiM sulabhaanukampaam.h
vishvasya maataram.h aki~nchana kaamadhenum.h
vishvaMbharaam.h asharaNaH sharaNaM prapadye.. 1

tvam.h vyaahR^itiH prathamataH praNavaH priyaste
saMvedayatyakhila mantra gaNastameva.
itthaM pratiita vibhavaam.h itareShvidaaniiM
stotuM yathaavadavane ka ivaarhati tvaam.h.. 2

nityaM hitaahita viparyaya baddha bhaave
tvadviixaNaika vinivartaya bahu vyapaaye.
mugdhaaxarairakhila dhaariNi modamaanaa
maataH stanandhaya dhiyaM mayi vartayethaaH.. 3

sa~Nkalpa kiMkara charaachara chakravaalaM
sarvaati shaayinaM ananta shayasya puMsaH.
bhuumaanam.h aatma vibhavaiH punaruktayantii
vaachaam.h abhuumir.h api bhuumir.h asi tvamekaa.. 4

vedhastR^iNaavadhi vihaara parichchhadam.h te
vishvaM charaacharatayaa vyatibhidya maanam.h.
amba tvadaashrita tayaa paripoShayantii
vishvaMbharasya dayitaa.asi tadeka naamaa.. 5

sarvaM sahetyavaniritya chaleti maataH
vishvaMbhareti vipuleti vasundhareti.
anyaani chaanya vimukhaanya bhidhaana vR^ityaa
naamaanyamuuni kathayanti tavaanu bhaavam.h.. 6

taapaan.h xipan.h prasavitaa sumano gaNaanaaM
prachchhaaya shiitala talaH pradishan.h phalaani.
tvatsa~Ngamaat.h bhavati maadhavi labdhapoShaH
shaakhaa shatair.h adhigato hari chandano.asau.. 7

smereNa vardhita rasasya mukhendunaa te
nispandataaM vijahato nijayaa prakR^ityaa.
vishraanti bhuumirasi tatva tara~Nga pa~NkteH
veleva viShNu jaladheH apR^ithagbhavantii 8

svaabhaavike vasumati shrutibhir.h vibhaavye
patyur.h mahimni bhavatiiM pratipanna vaasaam.h.
sha~Nke vimaana vahana pratimaa samaanaaH
stamberam.h prabhR^itayo.api vahanti satvaaH.. 9

saMbhaavayan.h madhuripuH praNayaanurodhaat.h
vaxaH sthalena varuNaalaya raaja kanyaam.h.
vishvaMbhare bahumukha pratipanna bhogaH
sheShaatmanaa tu bhavatiiM shirasaa dadhaati.. 10

kriiDaa varaaha dayite kR^itinaH xitiindraaH
sa~Nkrandas.h taditare.api dishaamadhiishaaH.
aamodayanti bhuvanaani alika aashritaanaam.h
amba tvada~Nghri rajasaaM pariNaama bhedaiH.. 11

bhuuteShu yat.h tvadabhimaana visheSha paatraM
poShaM tadeva bhajatiiti vibhaavayantaH.
bhuutaM prabhuutaguNa pa~nchakam.h aadyameva
praayo nidarshanatayaa pratipaadayanti.. 12

kaantastavaiSha karuNaa jaladhiH prajaanaam.h
aj~naatila~Nghana vashaadu pajaata roShaH.
ahnaaya vishva janani xamayaa bhavatyaa
sarvaavagaahana sahaam.h upayaatya vasthaam.h.. 13

aashvaasanaaya jagataaM puruShe parasmin.h
aapanna raxaNa dashaam.h abhinetu kaame.
antarhitetara guNaadabalaa svabhaavaat.h
audanvate payasi majjanam.h abhyanaiShiiH.. 14

puurvaM varaaha vapuShaa puruShottamena
priitena bhogi sadane samudiixitaayaaH.
paadaahataaH pralaya vaaridhayastavaasan.h
udvaaha ma~Ngala vidher.h uchitaa mR^ida~NgaaH.. 15

vyomaati la~Nghini vibhoH pralayaamburaashau
veshanta lesha iva maatum.h ashakya muurteH.
sadyaH samudra vasane sarasair.h akaarShiiH
aananda saagaraM apaaraM apaa~Nga paataiH.. 16

damShTraa vidaarita mahaasura shoNitaa~NkaiH
a~NgaiH prayastava dadhe parirambha liilaam.h.
saa te payodhi jala keli samutthitaayaaH
sairandhrikeva vidadhe navam.h a~Ngaraagam.h.. 17

anyonya saMvalana jR^imbhita tuurya ghoShaiH.
saMvarta sindhu salilair.h vihitaabhiShekaa.
ekaata patrayasi vishvamidaM guNaiH svaiH
adhyaasya bhartur.h adhikonnatam.h aMsa piiTham.h.. 18

bhartustamaala ruchire bhuja madhya bhaage
paryaaya mauktikavatii pR^iShataiH payodheH.
taapaanubandha shamanii jagataaM trayaaNaaM
taaraapathe sphurasi taarakitaa nisheva.. 19

aasakta vaasava sharaasana pallavaistvaaM
saMvR^iddhaye shubha taTidguNa jaala ramyaiH.
devesha divya mahiShiiM dhR^ita sindhu toyaiH
jiimuuta ratna kalashair.h abhiShi~nchati dyauH.. 20

aavirmadairamara dantibhir.h uhyamaanaaM
ratnaakareNa ruchiraaM rashanaa guNena.
maatastriloka jananiiM vana maaliniiM tvaaM
maayaa varaaha mahiShiim.h avayanti santaH.. 21

niShkaNTaka prashama yoga niShevaNiiyaaM
chhaayaa visheSha paribhuuta samasta taapaam.h.
svargaa pavarga saraNiM bhavatiimushanti
svachchhanda suukara vadhuum.h adhuuta pa~Nkaam.h.. 22

gaNDojvalaaM gahana kuntala darshaniiyaaM
shailastaniiM tarala nirjhara lamba haaraam.h.
shyaamaaM svatastriyuga suukara gehini tvaM
vyaktiM samudra vasanaaM ubhayiiM bibharShi.. 23

niH saMshayaiH nigama siimani viShNu patni
prakhyaapitaM bhR^igu mukhair.h munibhiH pratiitaiH.
pashyant.h yananya para dhii rasa saMstutena
santaH samaadhi nayanena tavaanu bhaavam.h.. 24

saMchoditaa karuNayaa chaturaH pumarthaan.h
vyaatanvatii vividha mantra gaNopagiitaa.
saMchintyase vasumati sthira bhakti bandhaiH
antar.h bahishcha bahudhaa praNidhaana daxaiH.. 25

kriiDaa gR^ihiita kamalaadi visheSha chihnaaM
vishraaNitaabhaya varaaM vasudhe sabhuutim.h
daurgatya durviSha vinaasha sudhaa nadiiM tvaaM
saMchintayan.h hi labhate dhanadaadhikaaraan.h.. 26

udvela kalmaSha paramparitaad.h amarShaat.h
uttaM sitena harima~njalinaa apyadhR^iShyam.h.
aakasmiko.ayamadhigamya yati prajaanaam.h
amba tvadiiya karuNaa pariNaama eva.. 27

pratyekam.h abda niyutair.h api durvyapohaat.h
praapte vipaaka samaye janitaanutaapaat.h.
nityaaparaadha nivahaachchakitasya jantoH
gantuM mukunda charaNau sharaNam.h xame tvam.h.. 28

traaNaabhisandhi subhage.api sadaa mukunde
saMsaara tantra vahanena vilambamaane.
raxaa vidhau tanubhR^itaam.h anaghaanukampaa
maataH svayaM vitanuShe mahatiimapexaam.h.. 29

dharma dR^ihaM sakala duShkR^iti saarva bhaumam.h
aatmaana bhij~nam.h anutaapa lavojjhitaM maam.h.
vaitaana suukara pateshcharaNaara vinde
sarvaM sahe nanu samarpayitum.h xamaa tvam.h.. 30

taapatrayiiM niravadhiM bhavatii dayaardraaH
saMsaara gharma janitaaM sapadi xipantaH.
maatar.h bhajantu madhuraamR^ita varSha maitriiM
maayaa varaaha dayite mayi te kaTaaxaaH.. 31

patyur.h daxiNa paaNi pa~Nkaja puTe vinyasta paadaambujaa
vaamaM pannaga saarva bhauma sadR^ishaM parya~Nkayantii bhujam.h.
potra sparsha lasat.h kapola phalakaa phullaara vindexaNaa
saa me puShyatu ma~Ngalaan.h yanudinaM sarvaaNi sarvaM sahaa.. 32

asye shaanaa jagata iti yaa shruuyate viShNupatnii
tasyaaH stotraM virachitamidaM ve~NkaTeshena bhaktyaa.
shraddhaa bhakti prachaya guruNaa chetasaa saMstuvaano
yadyat.h kaamyaM sapadi labhate tatra tatra pratiShThaam.h.. 33

kavitaarkika siMhaaya kalyaaNa guNa shaaline.
shrImate ve~NkaTeshaaya vedaanta gurave namaH.