He maan devii kailaasinii !
Jagat jananii kalyaanii !
Tum ho saare jag kii maataa
Mai nij bete kii hatabhaginii jananii

Maan tumako maloom hai, jisake liye main
Tumse karuNa kii bhikh maangane aa-ii hoon
Wah ko-ii aparaadhii nahiin, meraa ansh hai
Mere jiine kaa abhipraay hai, budhaape kii lathii hai
Jhukii aur kamajor asthiyon kii shakti hai

Mere sut ke tan pe madhur bhav chhalakataa hai
Amrit se bharaa wah pyaalaa hai
Jise choom-choom kar main jiitii hoon
Esaliye merii prarthanaa , tum swiikaar karo
Aur mere sut ko mangalamay varadaan do

Mera beTaa swabhaav kaa bada hii miiThaa hai
Dukh ke karuepan sah nahiin sakataa hai
Mere aangan kaa chaand hai, andhere kaa ujaalaa hai
Subah kii ushaa kiraN kii tarah sukhadaayi hai
Os kaN kii tarah pyaara aur manamohak hai

Tumhaare sivaa, is lok mein meraa kaun hai maataa
Tum bhalii-bhaanti jaanatii ho, is duniyaa mein
Keval maa ban jaane se mamatwa pooraa nahiin ho jaataa
Isaliye vinatii hai, mere sut kaa mangalamay kar do jiivan
Badale mein tum le lo meraa, ko-ii bhii swarNim kshaN

Mujhako meraa sukh triNavat lagataa hai
Main kaise dekhoon, putra kaa vyathit man
Rupayaa-paisaa, sonaa-chaandii mere kis kaam kaa
Yah sab to hai maaTii dhan
Tum lauTaa do mere putra kaa madhumay jiivan

Jab dekhatii hoon apane sut ko udaas
Bajrayaan TooT paHDtaa hai mere kaleje par
DhaaHD uThataa hai, vivash maan kaa hriday
Kisii jakhmii sheranii kii tarah
Kab tak beTe ko rugn aur udaas dekhoon
kab tak apane hii tan kaa lahoo
NichoHD- nichoHD kar piitii rahoon
Maataa bhar do usake hriday mein sukh- vibhutaa
Aur mangalamay kar do jiivan usakaa

Tum prakash kii mahasindhu ho
Thodii roshanii mere sut ko bhii de do
Tumhaare man kii ye kaisii duvidhaa
Ki devii hokar bhii mere putr kaa
Madhumay jiivan lauTaane se hichak rahii ho

Tum merii tarah asahaay naarii nahiin ho
Tum mahaashaktii kii devii ho
Fir kyon nahiin, mere sut ke dukh- dard
Ke garal ko amrit samajh pii letii ho
Aur apanaa prem- piiyushh barasaakar
usake tan-man ko shiital kar detii ho