Dou siecle vuel chanteir
Que je voi enchanteir.
Teiz venz porra venteir
Qu'il n'ira pas ensi.
Papelart et beguin
Ont le siecle houni.
II
Tant d'ordres avons ici,
Ne sai qui les sonja:
Ains Dex teiz genz n'onja
N'il ne sont ci ami.
Papelart et beguin

III
Frere Predicatour
Sont de mout simple atour,
Et s'ont en lor destour,
Sachiez, maint parisi.
Pa et

IV
Et li Frere Menu
Nos ront si pres tenu
Que il ont retenu
De l'avoir autresi.
P et b

V
Qui ces .II. n'obeït
Et qui ne lor gehit
Quanque il onques fist,
Teiz bougres ne nasqui.
P et b

VI
Assez dient de bien,
Ne sai c'il en font rien.
Qui lor done dou bien,
Teil proudome ne vi.
P et

VII
Cil de la Trinitei
Ont grant fraternitei.
Bien se sont aquitei:
D'anes ont fait roncins.
P

VIII
Et li Frere Barrei
Resont craz et quarrei.
Ne sont pas enserrei:
Je les vi mescredi.
P

IX
Nostre Freire Sachier
Ont lumeignon fait chier.
Chacuns semble vachier
Qui ist de son maisni.
P

X
Beguines avon mont
Qui larges robes ont.
Desouz les robes font
Se que pas ne vos di.
P

XI
Sept vins filles ou plus
At li rois en renclus.
Onques mais cuens ne duz
Tant n'en engenuÿ.
P

XII
L'Ordres des Nonvoians,
Teiz Ordres est bien noians.
Il tastent par laians:
'Quant venistes vos ci?'
P

XIII
Li Frere Guillermin,
Li autre Frere Hermin,
M'amor lor atermin:
Jes amerai mardi.
Papelart et beguin
Ont le siecle honi