AULD comrade dear, and brither sinner,
How's a' the folk about Glenconner?
How do you this blae eastlin wind,
That's like to blaw a body blind?
For me, my faculties are frozen,
My dearest member nearly dozen'd.
I've sent you here, by Johnie Simson,
Twa sage philosophers to glimpse on;
Smith, wi' his sympathetic feeling,
An' Reid, to common sense appealing.
Philosophers have fought and wrangled,
An' meikle Greek an' Latin mangled,
Till wi' their logic-jargon tir'd,
And in the depth of science mir'd,
To common sense they now appeal,
What wives and wabsters see and feel.
But, hark ye, friend! I charge you strictly,
Peruse them, an' return them quickly:
For now I'm grown sae cursed douce
I pray and ponder butt the house;
My shins, my lane, I there sit roastin',
Perusing Bunyan, Brown, an' Boston,
Till by an' by, if I haud on,
I'll grunt a real gospel-groan:
Already I begin to try it,
To cast my e'en up like a pyet,
When by the gun she tumbles o'er
Flutt'ring an' gasping in her gore:
Sae shortly you shall see me bright,
A burning an' a shining light.
My heart-warm love to guid auld Glen,
The ace an' wale of honest men:
When bending down wi' auld grey hairs
Beneath the load of years and cares,
May He who made him still support him,
An' views beyond the grave comfort him;
His worthy fam'ly far and near,
God bless them a' wi' grace and gear!
My auld schoolfellow, Preacher Willie,
The manly tar, my mason-billie,
And Auchenbay, I wish him joy,
If he's a parent, lass or boy,
May he be dad, and Meg the mither,
Just five-and-forty years thegither!
And no forgetting wabster Charlie,
I'm tauld he offers very fairly.
An' Lord, remember singing Sannock,
Wi' hale breeks, saxpence, an' a bannock!
And next, my auld acquaintance, Nancy,
Since she is fitted to her fancy,
An' her kind stars hae airted till her
gA guid chiel wi' a pickle siller.
My kindest, best respects, I sen' it,
To cousin Kate, an' sister Janet:
Tell them, frae me, wi' chiels be cautious,
For, faith, they'll aiblins fin' them fashious;
To grant a heart is fairly civil,
But to grant a maidenhead's the devil.
An' lastly, Jamie, for yoursel,
May guardian angels tak a spell,
An' steer you seven miles south o' hell:
But first, before you see heaven's glory,
May ye get mony a merry story,
Mony a laugh, and mony a drink,
And aye eneugh o' needfu' clink.
Now fare ye weel, an' joy be wi' you:
For my sake, this I beg it o' you,
Assist poor Simson a' ye can,
Ye'll fin; him just an honest man;
Sae I conclude, and quat my chanter,
Your's, saint or sinner,ROB THE RANTER.