Maibunubon,
Agrusing ket tumanor latta
Iti minuyongan ti kasaluyotan
Sumarsaruno a kaputotan Ni Pedro Bucaneg.

Ta uray saanton nga agtaraok
Dagiti kawitan iti parbangon
Malukagto latta ni Saluyot
Baet narnekan a turog
Ket idaniwnanto lattat' kinasaluyotna.

Agbukar a kas maysa a rosas
Iti hardin ti prosa ken literatura
Agsantak ket agadiwara ti banglona
Ket tagibenennanto ti talugading
A tawidna ken Pedro Bucaneg.

Wen, maisarusar latta dagiti bin-i a binatog
Maitukit ket agrusing iti muging dagiti tumantanor a mannaniw.