“For that power haven not we
Him hol to Maken In non degre;
But helthe Ayen to him Most gon
Be him that him it leide vppon;
And elles but he wele him hele sende,
Be vs get he non In non Ende.”
Thanne Axede him the king Anon tho
‘Howgh Ayens the Egipciens he scholde do;
yif with hem heeld he Ony bataille,
In what Manere it myhte him Availle.’
Thanne the devel him Answerid ful sone,
“Þere-Offen Answere mown we yeven þe none:
Tyl that goddis Man be Owt past,
Of vs An Answere non thow hast.”
Thanne spak Josephes there Anon Ryht,
“I Conioure the be the vertu of God Almyht,
And be the myht Also Of the Trenite,
That the sothe here thou schewe to me.”
And the devel him Answerid Agein
“That he ne Cowde not In Certein;
Of thing that was to Come, he Cowde not telle,
What Aventure so that him Euere befelle.”