Ab to uTh saktaa nahiiN aankhoN se baar-e-intizaar
kis tarah kaaTe ko'ii lail-o-nahaar-e-intizaar

unkii ulfat kaa yaqiiN ho unke aane kii ummiid
hoN ye dono suuraten tab hai bahaar-e-intizaar

merii aaheN naa-rasaa, merii duaaeN naa-qubuul
yaa ilaahii kyaa karuuN maiN sharmsaar-e-intizaar

unke Khat kii aarzuu hai, unkii aamad kaa Khayaal
kis qadar pailaa hu'aa hai kaarobaar-e-intizaar