I da dizzied hoose, a strum of flechs baet
endless drums fornenst a frenzied window.
Belligerent, dey want nedder in nor oot.

Apö da broo, ahint a wheeshtit chapel,
twa windmills spin new soondscapes owre
da laand, kert-wheelin alleluias.

Cloistert granite hadds a orchestration
o birds, a oorie whirr, a vimmerin
o whaaps an peewits. Da wind

troo da grind is a spaekin in tongues
wi da bruckit feed-hoop tunin in:
idder-wirdly, intimately insistent.

Aa dis music ta lö tae, ta slip inta:
a aald organ nönin, a hushie hubbelskyu.
Up owre da hill, airms turn, da haert lifts.