A mile aff we catch a glisk
o Brekken beach: webbed
atween headlands, a glansin arc
o ancient shalls
sun sillered.

Waves aff Arctic floes
bank in; dey shade fae cobalt
tae a glacial green; swall
an brack, rim on rim
o lipperin froad.

We rin owre dunes
crumplin smora,
fling aff wir shön
birze sand trowe taes
dell an bigg it;
shaste da doon draa
o da waves, loup
der hidmost gasps.

Abune wis, solan plane an plummet
an on da cliff, a tystie
triggit up in black and white
gawps at wir foally.

Da sun draps doon ahint his keep
an we man leave
an Eden aert
ta him.