Pakuvata, manheru, tinongoti, "Ave mangwana",
Ichokwadi, hazvina njere kuti: "Muvate zvakanaka"
Inga zvingori pachena: svava, majaya, chembere,
Dope ndirwo rukukwe, mwando ndiro gumbeze!

Pakumuka, mambakwedza, inongova, "Kwayedza",
Hongu, hazvina musoro kubvunzana: "Ko mavata sei?"
Ungabvunza zviri pamhene akaita ngonono, dzihwa, dzivo?
Handiti madziro ematumba edu angori mapepa?

Zvicharamba vakadaro, sekuonawo kwedu isu,
Kusvika zuva rakuchauya chamupupuri chikuru kuru
Chigotiti simu, nezvitumba zvedu, zvese neimbwa,
Tigoti hwiru hwiru kunge ngoro yemoto yaErija:
Asi handioni tichiti dzi-i pana Yave: Takan'ora!