Handisi dombo, huku kana mhepo! Kwete!

Chaivapo chaindisunganidza naamai, mumhumbu,
Mwedzi mipfumbamwe, kudya ndichiwana.
Chiripo chinondibatanidza nemhuri, panyika,
Upenyu hwose tsigiro neyamuro ndichiwana.
Chiripo chinondisungamidza nevadzimu,
Kurarama kwese vari mudonzvo nemwenje wangu,
Chiripo chinondibatanidza naZame Musikavanhu,
Kusikwa, kufa, kumuka, rwake ruoko ruchinongedza nzira.
Chiripo chichazondisunganidza nevari pasi, ndiri nyikadzimu,
Kufara, kusuwa; kuguta, kushaya ndichizovabatsira.
Chiripo chinondisunganidza neivhu rababa - Afrika,
Kupondwa, kushushwa, kuremadzwa, ndichingoshingirira.

Ichocho chacho ichocho,
Ndiko saka ndiripo
Nezuro, nhasi, mangwana, nekumhepo.