(Pakuuya kwe ESAP)

Baba, chokwadi mandikanda parumananzombe.
Munondigugudzira runyanhiriri runo, chimhukutira,
Monditi, "Sunga manyatera tirove pasi, izvozvi,
Usunge dzibate, rwendo rwacho rurefu-refu!"

Inga munoziva wani, ndiri munhu wemhuri,
Ndongonyangarika sedova mashambanzou ano,
Ndisina chandasiya ndapaka munzeve dzemhuri?
Hamuoni, ndikadzoka musha rangova dongo?

Inga munoziva, baba, kusunga ndinosunga chose,
Asika ndingasunga sei, zvakasimba sei chaizvo,
Ndisingazivi kureba kwerwendo rwamaronga?
Kune makata here, materu here, zuva here, chando here?

Madii kujekesa: ndepiko kwatakananga kwacho?
Kunei chaita kuti muronge sedimikira kudai?
Ndianiko ambokurotsai rwendo rwacho urwu?
Inga zvinenge zvaIsaka naAbrama kugomo reMoria!