Air - 'Voice of Spring.'
Now the bricht sun, and the soft simmer showers,
Deck a' the woods and the gardens wi' flowers;
But bonny and sweet though the hale o' them be,
There's ane aboon a' that is dearest to me;
An' oh, that's the white rose, the white rose o' June,
An' may
he
that should wear it come back again sune!

It's no on my breast, nor yet in my hair,
That emblem dear I venture to wear;
But it blooms in my heart, and its white leaves I weet,
When alane in the gloamin' I wander to greet,
O'er the white rose, the white rose, the white rose o' June,
An' may
he
that should wear it come back again sune!

Mair fragrant and rich the red rose may be,
But there is nae spell to bind it to me;
But dear to my heart and to fond memorie,
Tho' scathed and tho' blighted the white rose may be.
O the white rose, the white rose, the white rose o' June,
O may
he
that should wear it come back again sune!

An' oh! may the true hearts thy perils who share,
Remember'd wi' tears, and remember'd in prayer,
Whom misfortune's rude blast has sent far awa',
Fair breezes bring back sune to cottage and ha';-
Then, O sing the white rose, the white rose o' June,
An' may
he
that should wear it wear Scotland's auld croun!