Wi' a hundred pipers an' a' an' a',
Wi' a hundred pipers an' a' an' a';
We'll up an' gie them a blaw a blaw,
Wi' a hundred pipers an' a' an' a'.
Oh! It's owre the Border awa' awa',
It's owre the Border awa' awa',
We'll on and we'll march to Carlisle Ha',
Wi' its yetts, its castle, an' a', an' a'.

Oh! our sodger lads looked braw, looked braw,
Wi' their tartans, kilts, an' a', an' a',
Wi' their bonnets, an' feathers, an' glittering gear,
An' pibrochs sounding sweet and clear.
Will they a' return to their ain dear glen?
Will they a' return, our Hieland men?
Second-sichted Sandy looked fu' wae,
And mothers grat when they marched away.

Wi' a hundred pipers an' a' an' a',
Wi' a hundred pipers an' a' an' a';
We'll up an' gie them a blaw a blaw,
Wi' a hundred pipers an' a' an' a'.

Oh wha is foremost o' a', o' a'?
Oh wha does follow the blaw, the blaw?
Bonnie Charlie, the king o' us a', hurra!
Wi' his hundred pipers an' a' an' a'.
His bonnet an' feather, he's wavin' high,
His prancin' steed maist seems to fly,
The nor' wind plays wi' his curly hair,
While the pipers blaw in an unco flare.

Wi' a hundred pipers an' a' an' a',
Wi' a hundred pipers an' a' an' a';
We'll up an' gie them a blaw a blaw,
Wi' a hundred pipers an' a' an' a'.

The Esk was swollen, sae red and sae deep,
But shouther to shouther the brave lads keep;
Twa thousand swam owre to fell English ground,
An' danced themselves dry to pibroch's sound.
Dumfounder'd, the English they saw - they saw -
Dumfounder'd, they heard the blaw, the blaw;
Dumfounder'd, they a' ran awa', awa',
From the hundred pipers an' a', an' a'.

Wi' a hundred pipers an' a' an' a',
Wi' a hundred pipers an' a' an' a';
We'll up an' gie them a blaw a blaw,
Wi' a hundred pipers an' a' an' a'.