Ichot a burde in boure bryht,
That fully semly is on syht,
Menskful maiden of myht;
Feir ant fre to fonde;
In al this wurhliche won
A burde of blod ant of bon
Never yete y nuste non
Lussomore in londe.
Blow northerne wynd!
Send thou me my suetyng!
Blow northerne wynd! blow, blow, blow!

With lokkes lefliche ant longe,
With frount ant face feir to fonge,
With murthes monie mote heo monge,
That brid so breme in boure.
With lossom eye grete ant gode,
With browen blysfol under hode,
He that reste him on the rode,
That leflych lyf honoure.
Blow northerne wynd!
Send thou me my suetyng!
Blow northerne wynd! blow, blow, blow!

Hire lure lumes liht,
Ase a launterne a-nyht,
Hire bleo blykyeth so bryht,
So feyr heo is ant fyn.
A suetly swyre heo hath to holde,
With armes, shuldre ase mon wolde,
Ant fingres feyre for to folde,
Gold wolde hue were myn!
Blow northerne wynd!
Send thou me my suetyng!
Blow northerne wynd! blow, blow, blow!

Heo is coral of godnesse,
Heo is rubie of ryhtfulnesse,
Heo is cristal of clannesse,
Ant baner of bealte.
Heo is lilie of largesse,
Heo is parvenke of prouesse,
Heo is solsecle of suetnesse,
Ant lady of lealte.

For hire love y carke ant care,
For hire love y droupne ant dare,
For hire love my blisse is bare
Ant al ich waxe won.
For hire love in slep y slake,
For hire love al nyht ich wake,
For hire love mournynge y make
More then eny mon.
Blow northerne wynd!
Send thou me my suetyng!
Blow northerne wynd! blou, blou, blou!