kis ko qaatil maiN kahuuN kis ko masiihaa samajhuuN
sab yahaaN dost hii baiThe haiN kise kyaa samajhuuN

vo bhii kyaa din the ke har vah'm yaqiiN hotaa thaa
ab haqiiqat nazar aaye to use kyaa samajhuuN

dil jo TuuTaa to ka'ii haath du'aa ko uThThe
aise maahaul meN ab kis ko paraayaa samajhuuN

zulm ye hai ke hai yaktaa terii begaanaaravii
lutf ye hai ke maiN ab tak tujhe apnaa samajhuuN